¿Qué ye UNA-Mocedá?

UNA-Mocedá ye una organización política de mocedá asturiano que naz al envís d'avanzar nel camín entamáu va más de 30 años pa la construcción d'Asturies como un país socialmente xustu y nacionalmente llibre. Definímonos como una organización asamblearia que ta abierta a cualquier moza o mozu que quiera participar de la nuesa actividá mesmo militando activamente que simpatizando.

Naguamos por una nueva manera de facer política, que ta representada n'UNA, federación de la que somos les sos mocedaes. Talantamos esta opción como una alternativa útil dende'l nacionalismu d'izquierdes al caciquismu y clientelismu del PP-PSOE y al combayamientu d'IX-BA-LV. Camentamos qu'UNA ye'l preséu pa construyir dende les instituciones un modelu asturianu de sociedá, sostenible a nivel social y ambiental y arguyosu de la so indentidá llariega como base imprescindible pa construyir la identidá nacional. Esta llucha institucional ye válida y complementaria coles otres víes tradicionales de llucha na cai, yá seyan manifestaciones, defensa del puestu de trabayu, de los drechos de los estudiantes o resistencia cívica énte la opresión nacional y el desaniciu cultural y llingüísticu que sufre Asturies.

Camentamos que la mocedá ha de tar organizao pa puxar pola igua de los problemes que más-y afeuten anguaño, como son; el fracasu del sistema educativu, la precariedá llaboral que lleva a la emigración y les dificultaes p'acceder a una vivienda digna. Pol algame d'estos intereses ponemonos a disposición de tou/a mozu/a que quiera andechar na xera de finar col modelu económicu neolliberal, verdaderu causante d'estes problemátiques. Pa ello afalaremos la formación de la mocedá pa que dende la organización y l'asociacionismu seyamos quien a algamar un modelu económicu socialmente más xustu.

Declarámonos escontra de la represión sufrida a diario, y cada vegada más intensa n'Asturies, per parte de les “fuercies de seguridá” dirixíes poles alministraciones de los partíos turnistes, asina como'l clima de conservadurismu social qu'afala l'apaición d'actitúes qu'agreden y amenacen, y que fomenten un discursu racista que namás que sirve pa dividir a la case trabayadora. UNA-Mocedá ye, poro, una organización antifascista, que reivindica y reconoz el pasáu de llucha del nuesu pueblu.

Lluchamos escontra la esplotación de la muyer nun sistema de sociedá fuertemente patriarcal, p'algamar un modelu non-sexista.

Por últimu consideramos qu'ún de los problemes que remanecen del sistema económicu actual ye la especulación col suelu, l'esfarrape de la bayura ecolóxica y la esplotación de les fontes d'enerxía llariegues p'abastecer necesidaes ayenes, énte ello defendemos un desendolque sostenible que respete'l nuesu mediu natural.

Pa más información: moceda@unida.as